Les mots surlignés font l'objet d'une note
1Monseigneur, jay receu presentement la votre quil vous a pleu mescrire de Laval
2ce jourdhuy, de laquelle jay faict lecture à monseigneur le presidant.
3Il vous remercie de la bonne souvenance quavez de luy et ma commandé
4vous presenter ses humbles recommandations. Quant à sa disposition, elle est telle
5quelle estoit avant ier que je le vous escrivis, excepté que pour avoir trop pris de
6pillulles que monsieur maistre Nicollas disoit estre plus propres à conforter
7lestomac quà aultre chose, elles luy ont donné ung flux de ventre
8qui luy fist faire ier jusques à soupper six ou sept selles, et depuis souper
9jusques à ceste heure, neuf, tellement quil na disné de si bon appetit
10quil avoit faict ces jours passez. Nous verrons comme il souppera bien. Ledit
11sieur maistre Nicollas dict que ce flux de ventre nest rien et quil ne durera plus
12longuement que ce jourdhuy, dont je seray bien joieux, car sil ne dure
13davantage, se luy sera santé. Son apostème flue tousiours ; elle nest
14si profonde dung tiers quelle estoit au commancement. Nous luy avons
15faict boire du vin blanc fort bon, dont il a esté bien tost las et sest
16remis au clairet, quil trouve tousiours amer. Il vous prie ne luy escrire
17pour encores daucunes nouvelles ny daffaires, en aiant assez dune qui est le
18recouvrement de sa santé, affin de povoir prendre lair des champs
19comme vous avez faict, ce quil espère faire vers la fin de ce moys ou
20au commancement de laultre. Dieu luy en face la grâce, affin quil
21vous puisse aller veoir à Laval, si tant vous y demeurerez ou ailleurs
22que vous serez. Ce pendant, faisant fin à la présente par mes très humbles
23recommandations à vostre bonne grâce, je prie Nostre Seigneur quil vous donne
24Monseigneur, en très bonne santé, longue et heureuse vie. De Grenoble,
25ce Xe aoust 1572 de
26vostre très humble et très obeissant serviteur
27de Bazemont, abbé d’Aiguebelle